Patay ang lima ka mga persona samtang anum ang pilason matapos maigu-an sang kilat sa mga banwa sang Pontevedra, Binalbagan kag Cauayan sa Negros Occidental.
Sa Pontevedra, tatlo ka mga persona nga naga pang-ani gamit ang harvester ang dead on arrival sa ospital samtang tatlo nila ka mga kaupdanan ang nakaluwas sang sila ang maigo sang kilat, mga las 6 Sabado sang gab-i.
Naga-edad ang mga napatay sang 44, 35 kag 60 anyos. Duha sa ila ang residente sang Pontevedra, samtang isa ang taga San Enrique.
Nagwa sa imbestigasyon nga bag-o lang gid nakatapos ani sang palay ang mga biktima kag sila ang nagasilong sa kamalig nga wala sang dingding sa Hacienda Manolo, Barangay DSB sa Pontevedra.
Samtang, nagtaliwan ang 18-anyos nga lalaki matapos naigo sang kilat sa Brgy. Caliling, Cauayan sadtong Biyernes, Oktubre 30.
Ang duha sini ka mga kaupdanan ang wala maano. Suno sa nakaluwas, nagatambay sila sa lugar kag bag-o lang gid nakapanghugas sang kamot. Masako ang pagpangilat sadto nga tion.
Suno sa survivor, gulpi lang natumba ang solterito kag naghambal nga naigo ini sang kilat.
Sa Binalbagan, naga-ulan sang nag-igo ang kilat sa puno sang lubi, nag-agi sa kuryente tubtob nag-igo sa balay, kun diin yara ang apat ka magkapamilya sa Sitio Kapaklan, Barangay Santol, mga pasado las 4 sang hapon sang Sabado.
Gindala sa ospital ang mga biktima apang nagtaliwan ang 52-anyos nga amay.
[sibwp_form id=1]