
Naglinapta ang mga humay sa highway nga sakop sang Purok Eucalyptus, Barangay Calumangan sa Bago City.
Nakarga ang mga humay sa itom nga canter double cab.
Ginsiling ni Police Captain Emman Anacleto, deputy chief sang Bago PNP, nadulaan sang kontrol ang salakyan, nagbunggo sa road barrier kag nahulog sa kalog, Miyerkukes sang hapon.
Sandig sa traffic investigation sang Bago PNP, gikan Taloc kag magapadulong kuntani sa Calumangan Rice Mill ang salakyan agud ipagaling ang mga humay.
Nakaangkon sang minor injuries ang driver sang salakyan, tatlo niya ka helpers, kag isa ka biker nga naigo sang sako sang humay.
Gindala sa ospital ang lima ka napilasan.
Ginbuligan naman sang mga residente nga matipon ang naglinapta nga mga humay nga pwede pa mapuslan.