Ang lima ka regular employees sang siudad sang Bacolod ang gina lakipan sang engineers kag anay pamuno sang Office of the Building Official nga amo ang ginpapanaugan sang show cause order kahapon, Disyembre 1, may kaangtanan sa pag-grant nila sang fencing permit sa Barangay Villamonte sang tuig 2024.
Suno kay Mayor Greg Gasataya, kalabanan sa mga empleyado nga napapanaugan sang show cause order amo ang pila ka mga engineers kag ang anay head OBO.
Pahayag sang alkalde, luyag sang siudad mahibaluan kon ano ang partisipasyon kag responsibilidad sang tagsa ka empleyado sa proseso sang pag-issue sang fencing permit, kag sa pagproseso man sang dokumento sang isa ka private individual kag kumpanya.
Ginhatagan sang lima ka adlaw ang mga empleyado agud mag-submit sang ila sabat sa show cause order kag ipahayag ang ila explanation sa nasambit nga isyu.
Sang nagligad nga semana may duha ka mga pader nga na diskubrehan nga gintukod sa mga creek nga nangin kabangdanan sa pagbaha. Ang isa sa Barangay 20 nga boluntaryo nga ginguba sang nagpatukod sini kay wala sang fencing permit kag ang isa sa Barangay Villamonte nga natagaan sang permit bisan ara sa creek kag naga block sa natural flow sang tubig.
Gina kabalak-an pa gid kay prone man sa landslide ang lugar kag may mga residente sa dalom sini.
Gani gina pangayuan sang paathag ang mga engineers kun paano
natagaan sang fencing permit ang tag-iya sang propiedad.*