Ginapaabot nga sugudan na sa masunod nga bulan ang pag rehabilitate sang dog pound sang Bacolod City Veterinary Office nga nahamtang sa Barangay 35.
Apang antes sini, ginsiling ni Levy Pangue, pamuno sang Bacolod City Legal Office Enforcement Team, nga kinahanglan anay makakas ang 47 ka mga balay nga maigo sang una nga bahin sang rehabilitation.
Una na nga ginsiling sang City Engineer’s Office nga may 148 ka mga balay ang yara mismo sa sulod sang compound nga kinahanglan mapangkakas para mapatuman na ang programa.
Dugang ni Pangue, nakigsapol naman ang Barangay sa mga apektado nga residente kaupod ang Bacolod Housing Authority kag nagkalain-lain nga ahensya sang nagliligad nga inadlaw.
Ginapa evaluate pa sa BHA kun pila ang kwalipikado nga mga residente ang sarang nga mahatagan sang relocation bangud man iban man sa mga natungdan ang nahatagan na sang relocation sang una, apang nagbalik sa gihapon sa amo nga lugar.
Ginpangabay naman ang mga residents nga boluntaryo nalang nga magbiya sa ila gina-istaran kag handa man nga mag assist ang CLO sa ila sa paghakot sang ila mga gamit.
Kapin 3.2 million pesos ang pondo para sa pagkaayo sang mga cage kag pagtakod sang solar panels sa dog pound.
Samtang may kapin sa 10 million pesos naman nga ginpain nga pondo ang siudad para sa pagpatukod sang building sa sulod sang pasilidad.
[sibwp_form id=1]