45-anyos nga babaye nga luyag kuntani magsalbar sa iya amay nga na-igo sang live wire sa isa ka cafe sa Pontevedra, nakuryente-patay.
Ginbawian sang kabuhi ang 45-anyos nga babaye samtang pilason naman ang iya 80-anyos nga amay matapos makuryente sa isa ka cafe sa Barangay Miranda, banwa sang Pontevedra, Negros Occidental, Domingo sang hapon.
Ginsiling ni Police Captain Darryl Kuhutan, hepe sang Pontevedra PNP, magamit kuntani sang comfort room ang 80 anyos nga amay sang na-igo ang iya ulo sang nagaluyloy nga live wire.
Gilayon naman nga nagtabang ang 45-anyos nga anak sang lalaki, rason nga siya ang nakuryente man.
Gindala sa Valladolid District Hospital ang mga biktima apang gindeklarar nga dead on arrival ang babaye.
Lunsay mga taga syudad sang Bago ang mga biktima.
Suno kay Kuhutan, nagahulat pa ang kapulisan sa mangin desisyon sang pamilya kun sila ang magapasaka sang kaso ukon indi na batuk sa management sang nasambit nga palamahawan.