Padayon ang pag-install sang Bacolod City Engineer’s Office sang walo ka mga bag-o nga traffic lights nga nagagamit sang Artificial Intelligence para sa lakat sang trapiko sa walo ka mga mayor nga intersection sa siudad.
Ginsiling ni Bacolod City Mayor Greg Gasataya nga apat sa mga intersection nga may AI-based system ang operational na sa karon.
Ini ang nahamtang sa mga dalan sang BS Aquino-Lacson, Rizal-Lacson, Hernaez-Lacson, kag Araneta-Lizares.
Ginklaro sang alkalde nga ang bag-o nga traffic lights ang wala na sang fixed time, kag ang AI na ang matumod kun ano kalawig ang stop kag go sa intersection, depende sa kadamuon sang salakyan nga makita sa radar camera.
Dugang niya, dako ang mabulig sang ini nga teknolohiya agud mapadasig ang lakat sang trapiko sa siudad ilabi na nga ginapaabot nga magdamo ang mga salakyan bangud sa nagahilapit na nga Masskara Festival.
Ini man ang tion suno sa iya agud ma assess sang maayo ang kapasidad sang traffic lights nga may AI-based system.
Plano man sang siudad nga mapakaayo pagid ang mga traffic lights sa iban nga mga area nga naguba na.
Ginapa-assess sang alkalde sa City Engineer’s Office ang posibilidad nga magamit pa ang mga poste sang guba na nga mga traffic lights agud ang software nalang ang baklon sang siudad para mas barato ang igu-an.
[sibwp_form id=1]