4 pilason sang nagbaliskad ang tricycle sa Bago City.
Nakaangkon sang minor injuries ang apat ka mga persona, lakip na ang 65-anyos nga driver matapos magbaliskad ang ila ginasakyan nga tricycle sa national highway nga sakop sang Purok Paho, Barangay Taloc, Bago City, Domingo sang hapon.
Gindapatan sang first aid sang nagresponde nga rescuers ang mga pilason kag gindala sa ospital.
Base sa traffic investigation, yara sa outer lane ang tricycle samtang sa inner lane naman ang AUV nga salakyan. Pareho nga nagapadulong Bacolod nga direksyon ang duha ka mga salakyan.
Ginsiling ni Police Capt. Emman Anacleto, deputy chief sang Bago PNP, naglupok ang pang-unahan nga guma sa tu-o nga bahin sang salakyan, rason nga nagbalang-balang ini kag nabungguan ang tricycle.
Bangud sang impact, nagkulob ang tricycle.
Suno kay Anacleto, naka-istoryahanay na ang 59-anyos nga driver sang salakyan kag ang mga sakay sang tricycle.
Pagasabton sang driver sang salakyan nga taga Brgy. Banago, Bacolod ang medical expenses sang mga pilason.
[sibwp_form id=1]