Yara nakapungko sa fuel tank sang motorsiklo ang 4 ka tuig nga bata nga napatay sa head-on collision sang motor kag tricycle sa Hacienda Merced, Barangay Don Salvador Benedicto sa banwa sang Pontevedra, Negros Occidental.
Pilason naman ang 34-anyos nga driver sang motorsiklo kag ang iloy sang bata nga naga-angkas sa motor.
Taga Brgy. Manghanoy sa La Castellana ang driver, samtang ang mag-iloy ang residente sang Barangay Poblacion sa Guihulngan City, Negros Oriental.
Samtang, nakaangkon man sang mga pilas ang 39-anyos nga driver sang tricycle kag ang iya utod nga pasahero, pareho residente sang Brgy. Talaptap sa La Castellana.
Ginsiling ni Police Captain Darryl Kuhutan, hepe sang Pontevedra PNP, diretso kag malaba ang dalan kung diin nagluntad ang pagbungguanay.
Base sa imbestigasyon sang pulis, nag-overtake ang Suzuki nga motorsiklo sa isa pa gid ka motor, apang na-miscalculate sang driver ang distansya kag sila ang nakabunggo sa kasugata nga Kawasaki nga tricycle.
Padulong La Castellana ang motorsiklo samtang ang tricycle gikan Brgy. Antipolo kag padulong Brgy. San Juan sa Pontevedra.
Bangud sang impact, pareho nga nawasak ang motor kag tricycle.