Sa Incident Report nga ginpadala ni Gilda Luisma, City General Services Officer sang Bacolod, ginpahayag sini ang posibilidad nga may nagamit sang gin manipular nga pay slips agud maka-loan sa GSIS.
Ginpasakaan sang 32 ka mga empleyado ang amount sang ginabaton nila nga sweldo para maka loan.
Ang amo nga report nabaton kag na-endorso sa Office of the City Administrator sang Nobyembre 13, 2025 para sa mas madalom nga imbestigasyon.
Sa inisyal nga pagpangusisa, ginpangabay kag ginmanduan sang opisina sang City Legal Office nga i-submit ang Certified True Copies sang tanan nga GSIS loan documents, lakip na ang loan applications kag pay slips nga ginpresentar sang natungdan nga mga empleyado.
Ang mga dokumento ang ginahimo subong nga basehan sa pag-usisa sa posible nga iregularidad sa sulod sang GSO.
Nagapadayon ang imbestigasyon samtang ginahulat ang kompleto nga set sang dokumento gikan sa HRMO kag iban pa nga kaupod nga opisina.
Ang siudad nagpasiguro nga isa-isa nga lantawon ang records agud masiguro ang integridad kag transparency sa proseso sang loan application sang mga empleyado.*