Kadamuon sang mga registered voters sa Bacolod sarang magsobra sa 312 mil ka mga nakaparehistro sang tinalikdan nga 2019.
Humalin sang ginsugdan ang voters’ registration sang Comelec sang July 2020, nagalab-ot na sa 302,000 ang nagparehistro sa Bacolod Comelec office.
Pero suno kay atty. Kathrina Trinio-Cana, sarang pa ini malapawan ang masobra sa 312,000 ka mga registered voters sang 2019.
Ginpasalig man ni Cana nga may nagaka-igo sila nga personnel bisan pa sa pagdugok karon sang mga nagahingaw nga makarehistro antes sang September 30 nga deadline.
Iya lang ginapangabay sa mga nagapa-rehistro ilabi na sa mga naga-transfer sang ila voters registration nga kumpletohon ang ila mga requirements agud indi magbalik-balik kag mag-usik pa sang tiempo.
Humalin sang nagligad nga semana, kinyentos ka mga voter registrants ang sarang ma-accomodate sang Comelec kag dugang diri ang 150 para sa mga senior citizen kag mga person with disability.