Ginsiling ni retired Police Colonel Levy Pangue, head sang City Legal Enforcement Team, nagdangat na sa kapin 300 ka mga barker ang nadakpan bangud sa hugot nga pagpatuman sang Anti-Barking Ordinance sang siudad.
Ginpahayag ni Pangue nga ginatun-an liwat sang ila talatapan ang mas epektibo nga pagpatuman sang ordinansa, kag nagapakig-angut sila sa Bacolod City Police Office agud mas mapabakod pa ang operasyon batok sa barkers.
Dugang pa niya, ang mga barker nga nadakpan ang napasakaan na sang nagkalain-lain nga mga kaso, kag ginapatihan nga kapin 80 porsyento sa ila ang may record, lakip na ang kaso angut sa iligal nga droga, pagpangawat kag pagpanghimulos.
Nagapangabay man si Pangue sang kooperasyon sang publiko, ilabi na sang mga barangay, bangud dapat wala sang presensya sang mga barker sa bisan diin nga bahin sang siudad sang Bacolod.*