Pilason ang hepe, isa ka drug suspect kag isa pa gid ka pulis sang mahulog ang ginasakyan nila nga patrol car sa kalog sa kilid sang dalan sang Purok 4, Barangay La Granja sa La Carlota City, Sabado sang kaagahon.
Naga-ulan kag taalaklaron angdalan nga may madalum nga kalog sa kilid.
Gindala ang drug suspect kag isa ka police non-commissioned officer sa Don Salvador Benedicto District Hospital sa La Carlota. Sila ang may mga minor injuries.
Samtang, si Police Chief Capt. Dennis Melgarejo ang nakaangkon sang head injuries kag nabali ang lima niya ka mga ribs. Gindala siya sa isa ka pribado nga hospital sa Bacolod City.
Suno kay Capt. Judesses Catalogo, spokesperson sang Negros Occidental Police Provincial Office, yara na sa istable nga kondisyon ang hepe.
Tungod sang malain nga tiyempo, suno kay Catalogo, posible nadanlog ang salakyan kag nag-diretso sa kanal.
Gikan sila sa NOCPPO Provincial Forensic Unit sa syudad sang Bacolod kon diin ginpaidalum sa drug test ang nadakpan nga suspek sa buy-bust, bilang pagsunod sa protocol.
Pabalik na sila sa La Castellana kag nag-desisyon ang kapulisan nga mag-agi sa La Granja sang natabo ang insidente
