Ginkumpirmar ni Bacolod City Veterinarian Dr. Janine Sarthou nga humalin Enero tubtob Mayo sini nga tuig, may tatlo na ka ido ang nag positibo sa rabies.
Isa diri sa Barangay Vista Alegre samtang may duha naman sa Barangay Mansilingan.
Suno kay Sarthou, sa Vista Alegre, ginkagat sang ido nga may rabies ang iya nga owner. Amo man sini ang natabo sa owner sang isa ka ido nga nag positibo man sa rabies sa East Homes Mansilingan.
Samtang, ang isa naman ka layaw nga ido nga may rabies sa Purok Paghidaet Barangay Mansilingan ang nakakagat sang walo ka persona, sandig sa pagpangusisa sang Bacolod City Veterinary Office.
Matapos nga makakagat ang tatlo ka ido, nagkalamatay man ang mga ini.
Ang mga nagkalakagtan ang sa karun ginabantayan pa sang CVO agud ma siguro nga ma kompleto nila ang bakuna pang kontra sa rabies.
Samtang, nagdangat sa masobra 40,000 ka mga hinuptanan sa siudad ang tigayon na nga nabakunahan. Ini bangud sa nagapadayon nga house-to-house vaccination program sang CVO.
Target sang siudad nga mabakunahan ang malapit sa 100,000 ka mga ido nga ila na census sa 61 ka mga barangay sa siudad.
Sa bulan sang Mayo tubtob Hunyo, magapadayon ang house-to-house vaccination program sa Barangay Villamonte kag Mandalagan.
“Sa mga homeowners nga may gusto pabakunahan, approach your assigned BHW sa barangay kay gaupdanay man kami with the Barangay Health Workers tapos sila na ang gadala sang team naton. So hand in hand kita with the Barangay kag ang mga homeowners tani mapalapit man sila sa Barangay through their Barangay Health Workers para nga ma kadtuan gid sila”, suno kay Sarthou.*
[sibwp_form id=1]