3 anyos nga bata patay sang aksidente matiruhan sang 2 anyos nga bata

Ginbawian sang kabuhi sa San Carlos Doctors Hospital ang 3 anyos nga bata matapos siya ang gin-alegar aksidente nga matiruhan sang iya 2 anyos nga hinablos sa Barangay Bunga, banwa sang Don Salvador Benedicto.

Base sa inisyal nga imbestigasyon sang kapulisan, nakit-an sang duha ka mga bata ang pusil sa gwa sang balay kag abi anay nila isa ini ka halampangan. Ila gindala ang pusil sa sulod sang kwarto kag ginhampangan, ugaling gin-alegar napitik sang 2 anyos nga bata ang gatilyo kag naiguan sang bala sa dughan ang iya 3 anyos nga tiyo.

Ginsiling ni Police Major Ellendie Rebusquillo, hepe sang DSB PNP, may kabudlayan sila sa pag pat-od kun sin-o ang tag-iya sang homemade nga pusil bangud wala sang luyag mag-testify kag wala man sang CCTV sa lugar.

Suno sa hepe, ang pamilya, ang indi na luyag mag pagamo, kag indi man sila luyag nga ipaidalum ang bangkay sang biktima sa autopsy, kag i-subject ang 2 anyos nga bata sa paraffin test.

Sa karon, ang sarang na lamang nga mahimo sang kapulisan amo ang pagpabaskog sa kampanya batuk sa loose firearm agud malikawan na ang kasubong nga insidente.*

[sibwp_form id=1]