BACOD, UNDOC kag NBTC nga mga transport group nagapati nga mangin madinalag-on ang ila pag untat biyahe bisan indi mag-upod ang iban nga transport organization sa Lunes.
Plastado na ang plano sang Bacolod Alliance of Commuters, Operators and Drivers ukon BACOD upod sa Negros Bacolod Transport Coalition kag United Negros Drivers and Operators Center ukon UNDOC sa Lunes.
Ang grupo ang maga sugod rally sa atubang sang Bacolod City Government Center agud ipanawagan ang pag abolish sang City Ordinance 966 nga naga adopt sang Local Public Transport Route Plan.
Suno sa grupo ini ang kabangdanan kun ngaa indi pa nila ma renew ang provisional authority ginhatag sang Land Transportation Franchising and Regulatory Board agud nga mapadayon ang pagbiyahe sang ila mga gina operate nga traditional jeepney.
Ginsiling ni Rudy Catedtral, presidente sang BACOD nga mangin madinalag-on ang untat byahe bisan indi maga upod sa amo nga lihok ang Sentrong Samahan ng mga Tsuper at Operators Negros ukon SSTONE kag Federation of Bacolod City Drivers Association ukon FEBACDA.
Ginsiling man ni anay Bayan Muna Representative Atty. Carlos Zarate nga wala nila ginabalabagan ang jeepney modernization program nga amo ang ginasuportahan sang City Ordinance 966 ugaling nagapanawagan sila para sa just transition kag equitable nga pagpatuman sang program para sa ikaayo sang transport industry.