Nagapadulhog ang motorsiklo nga ginasakyan sang tatlo ka mga biktima sang ini ang makabunggo sa truck nga nagapasaka sa bahin sang Crossing Cabanyohan, Barangay Tampalon sa siyudad sang Kabankalan, sadtong Sabado sang gab-i.
Dead on arrival ang driver nga si alias Rico kag ang isa sini ka back-rider nga ginkilala kay alias Jomel.
Ang isa pa gid ka back-rider nga si alias Robin ang nadala pa sa ospital apang ini ang nagtaliwan man.
Sa imbestigasyon sang kapulisan, may kadasigon ang pagpadalagan sang motorsiklo sang mga biktima sa dalan nga dulhugon kag na-obserbahan man nga yara sila sa impluwensya sang makahulubog nga ilimnon.
Papauli na kuntani ang mga sakay sang motorsiklo sang nabunggo sa truck.
Ginsiling ni Traffic Investigator, Patrolman Romeo Elisan, may settlement na sa pamilya sang mga biktima kag tag-iya sang truck, gin-release naman ang driver sang truck matapos ang reglementary period.