Pila ka minutos nga gintinguhaan sang mga responders nga makuha ang mga sakay sang pickup matapos makabunggo sa likod sang truck nga may karga nga tubo sa Purok Acasia, Barangay Tapi sa Kabankalan City.
Nakaangkon sang mga pilas ang 42-anyos nga driver sang pickup, kag ang duha niya ka mga pasahero nga naga-edad 69 kag 38 anyos.
Mga manugbaligya sang ukay-ukay ang mga sakay sang pickup.
Base sa impormasyon, gikan Brgy. Locotan kag papauli na kuntani sa Himamaylan ang mga sakay sang pickup, sang magluntad ang insidente.
Naggwa sa traffic investigation sang Kabankalan PNP, temporaryo nga nag-park ang Fuso dump truck sa lugar kag nagbutang sang early warning device.
Apang sang hana na nga maglakat ang 25-anyos nga driver, ginkuha sini ang warning device kag nagsakay sa truck.
Samtang amat-amat nga nagalakat ang dump truck, nakabunggo sa likod ang pickup truck.
Suno kay Police Lt. Col. Roberto Indiape Jr., hepe sang Kabankalan PNP, dulhugon kag dulom ang area kag bangud bag-o lang nakuha ang early warning device, wala dayon matalupangdan sang driver sang pickup nga yara ang truck.
Gindala sa ospital ang mga sakay sang pickup truck samtang yara sa kustodiya sang Kabankalan PNP ang driver sang dump truck.*