20 anyos nga babaye nga may yara sang history of travel ang pinaka una nga kaso sang Mpox nga na record sang Talisay City.
Pahayag naman sang Provincial Health Office, wala sang dapat kabalak-an ang publiko.
Ginsiling ni Provincial Health Officer, Dr Girlie Pinongan tigayon na nga naka recover ang 20 anyos pero nagapabilin pa ini sa isolation sa ila nga puluy-an.
Paathag ni Pinongan 21 diyas ang isolation para sa Mpox.
Ika duha nga semana sang Hunyo sang naglain ang pamatyag sini, nakitaan sang rashes kag may pangadlay rason nga nag pa check-up.
Kay suspected Mpox case gin-abisuhan na siya nga mag isolate kag ginhatagan sang treatment.
Wala gin ospital ang pasyente. Sang weekend lamang nag gwa ang resulta nga siya ang positibo sa Mpox.
Nag isolate man ang iya nga pamilya kag ang LGU Talisay ang nag patigayon na sang contact tracing.
Suno kay Pinongan wala sang dapat kahadlukan. Importante nga mag observe sang hygiene labi na ang pag panghugas sang kamot.
Kun naga lain ang pamatyag labi na kun may makita nga unusual nga rashes, kag pagpangadlay mas maayo nga mag pa check up gilayon kag mag isolate.
Indi naman mapat-od kun diin kag paano nakuha sang 20 anyos ang Mpox.
Damlag pa nag-report na ang Bacolod sang una man nga Mpox case sini.
Samtang, may duha tubtob tatlo ka suspected Mpox cases sa Negros Occidental ang gina monitor man kag gina hulat pa ang resulta sang lab test.
“The patient is not admitted. Pero immediately after sang consultation niya kay naga suspect nga Mpox, gin-advise siya dayon isolation kay te sa balay naman siya. Kag diutay man lang sila sa balay, nag advise isolation sa ila man lang. As of now per LGU mayo man ang condition sang patient. Although ara pa iya rash daw amat amat na. Kag treated man ni siya immediately after nakuhaan siya test gin treat man siya dayon. Recovered na ni siya ya”, suno kay Pinongan.