Nag-angkon sang mga pilas sa lawas ang driver kag angkas sini sa motorsiklo matapos sila magpalapaw sa bahin sang kurbada nga dalan sakop sang Sitio Dungga, Brgy Maricalum, siyudad sang Sipalay kahapon sang hapon.
Ang driver nga ginkilala sa kay Lomeran Alejano Jr., nag angkon sang pilas sa tiil kag kamot. Gina reklamo niya ang iya likod kag liog nga naga sakit.
Ang angkas naman sini ang ginkilala sa kay Roy Zayco, 49 anyos, ang nakaangkon sang minor injuries.
Ang duha ang pareho nga taga Brgy Bacuyangan, Banwa sang Hinoba-an. Sa panaysayon ni Zayco, papauli na kuntani sila sa Hinoba-an, apang, sang sila ang maga overtake sa isa ka motorsiklo, naglapaw sila sa dalan kag nagrekta sa isa ka busay nga yara sa higad sang dalan.
Gilayon nga gindala ang mga biktima sa Sipalay City 24-hour observation unit kag gintagaan sang nagakaigo nga pagbulong.