Duha ang patay sa duha ka separado nga shooting incident sa Victorias City Biyernes sang aga. Gina pat-od pa sang PNP kun may kaangtanan ang duha ka natabo nga pagpaniro.
Patay sa una nga shooting incident si Jerome Seballos nga isa ka caretaker sang duta suno sa PNP.
8:20 sang aga sang nakabaton tawag ang PNP nga may natabo nga pagpaniro sa Sitio 5, Gawahon, Brgy 11. Sa inisyal nga impormasyon, mga 5:30 sang aga sang nabatian sang mga pumuluyo ang mga lupok.
May nakalabay nga mga residente sa motorsiklo nga naka park sa kilid sang dalan kag didto na nakita ang lawas ni Seballos nga may igo sang bala sa ulo. Duha ka cartridge case sang caliber .45 ang na-recover.
Mga duha ka kilometro ang kalayuon gikan sa lugar ni Seballos, nga sakop sa gihapon sang Sitio 5, may isa pa gid ka shooting incident nga natabo.
Ginkilala ang biktima kay Alex Cunanan, 59 anyos. Sa inisyal nga report ang bata ni Cunanan ang gin pwersa sang pito ka mga naka mask nga persona dala sa lugar kun diin siya.
Pag abot nila sa poultry farm nga gina teniran ni Cunanan, nagtinguha ang biktima nga malagyo pero siya ang gin paarakan tiro.
Nag agum ini sang nagkalain-lain nga pilas sa iya nga lawas.
Na-recover sa crime scene ang mga cartridge case sang duha ka 45mm kag 11 ka 5.56mm.
Si Seballos ang isa sa lima ka gin-alegar NPA nga gindakup sa Matab-ang Talisay sadtong Abril kag gin-report nga may kahilabtanan sa engkwentro nga nagluntad sa Toboso nga ginkamatay sang 19 ka persona.
Pero tigayon nga na-release si Seballos. Padayon pa ang pag pangusisa sang PNP sa shooting incident lakip na ang motibo.
[sibwp_form id=1]