Nagdangat na sa 29.5 million pesos ang kahalitan sa Moises Padilla nga natuga sang pag ulan kag pagbaha dala sang southwest monsoon nga gin pabaskog ni bagyo Crising.
May duha ka mga overflow nga indi pa sa gihapon malabyan.
Pinaka daku nga nahalitan amo ang mga dalan sa banwa nga nagdangat sa 21.5 million pesos base sa July 21 nga report.
Paathag ni Engr Reynald Horegue ang Municipal Disaster Risk Reduction Management Officer sang banwa, kalabanan sa sining mga dalanon mga gravel roads ukon indi sementado nga mga dalan.
Bangud sang kahalitan sang baha nangin mabudlay ang pag labay sa sining mga dalanon, pero wala nagakasayuran nga indi na ini maagyan.
May pila man ka mga overflow nga nahalitan suno kay Horegue nga naga lakip sang yara sa Brgy 4, kun sa diin ang kahalitan nagdangat sa 1.5 million pesos.
Padayon sa gihapon ang assessment sa iban pa gid nga damages sa mga infrastructure.
Ang overflow sa Brgy 1 kag Montilla suno kay Horegue ang indi pa tubtob sa karon ma agyan, tigaylo alternate na lamang nga lalabyan ang gina gamit sang mga pumuluyo.
Sa agriculture naman ang kahalitan naglab-ot sa 4.5 million pesos.
Nalakip na diri ang halit sa mga humayan, high value crops, livestock kag fisheries. Indi pa man mapat-od suno kay Horegue kun ang banwa maga declare sang state of calamity.
“Gravel road ni siya nga nag kala wash out, nagkala scar. Although pwede pa man siya agyan. Kumbaga ang impact niya sa difficulty may ara, pero siling nga i-hamper ya gid ang aton pag traverse, pakadto pakari indi man. Impassable lang ya sa gihapon ang aton mga overflow nga main nga gina agyan sa mga salakyan especially diri sa Barangay 1, Montilla going to Kabayabasan kag sa Montilla going to Macagahay”, suno kay Horegue.
