2 ka mga van nga naga wigit sang basura sa circumferential road gina usisa

Ginatutukan karon sang Bacolod City Legal Office ang duha ka naglain nga kaso sang iligal nga paghaboy sang basura sa Circumferential Road, Barangay Bata sa Bacolod, matapos makita ang duha ka van nga gin-alegar nagpanghaboy sang basura sa amo nga lugar.

Suno kay City Legal Office spokesperson Atty. Vanessa Encabo, may mga indibidwal nga nag testigo sa insidente kag nakakuha pa sang mga litrato nga nagapakita sang plate number sang mga salakyan nga ginapatihan may kahimuan sa illegal dumping.

Ginaklaro ni Encabo nga ang duha ka insidente natabo sa nagligad nga Enero 8 kag Enero 26 sang sini nga tuig, rason nga ginseryoso sang talatapan ang pag-usisa agud mapat-od ang responsable nga mga persona ukon establisyemento.

Subong kabahin sang imbestigasyon, nagapakig-angut na ang City Legal Office sa Land Transportation Office para matumod kun sin-o ang tag-iya sang mga closed van, kag sa Permits and Licensing Office naman para mahibaluan kun ini ang gin-gamit sang mga rehistrado nga negosyo sa syudad.

Ginpahanumdom man sang City Legal Office nga ang iligal nga paghaboy sang basura isa ka paglapas sang City Ordinance No. 596, series of 2012, nga nagadumili sang wala sing tarong nga paghaboy ukon dumping sang basura, kag ginakabig man ini nga bayolasyon sang Republic Act 9003 ukon Ecological Solid Waste Management Act.*

[sibwp_form id=1]