Naga-angkasanay sa motorsiklo kag papauli na kuntani ang duha ka mga estudyante nga magpakaisahanay matapos ang ila buhi sa eskwelahan, Huwebes sang hapon.
Apang pagkalab-ot sa Sitio Ulalod, Barangay Orong sa Kabankalan City, nadulaan sang kontrol ang 19-anyos nga driver sang motorsiklo sa dulhugon nga bahin sang dalan kag naglapaw sa taytay.
May kadalumon nga 12 ka tapak ang natup-an sang driver kag sang iya 20-anyos nga angkas.
May mga bato kag gina-iligan sang tubig pakadto sa tamburong ang lugar kun diin nahulog ang duha.
Samtang, ang ila motorsiklo ang nabilin sa dalan.
Ginsiling ni Police Capt. Sammy Gasataya, deputy chief sang Kabankalan PNP, nakaangkon sang head injury kag nabali ang tiil kag kamot sang magpakaisahanay. Sila ang gin-refer sa Corazon Locsin Montelibano Memorial Regional Hospital sa Bacolod City.
Suno kay Gasataya, may kadasigon ang pagpadalagan sang motorsiklo, dulhugon ang dalan, kag bag-o gid lamang natapos ang ulan gani may mga balas nga nag-ilig sa dalan. Ini ang posible rason kun nga-a nadulaan sang kontrol ang driver sa motorsiklo.
Gikan sa eskwelahan sa Barangay Camingawan kag papauli na kuntani sa Barangay Binicuil ang magpakaisa sang nagluntad ang insidente.