Naglupok ang goma sang truck nga may karga sang tubo kag nakabunggo sa Mitsubishi Xpander nga may sakay nga pito ka mga persona, lakip na ang driver sa Bangga Barrios, Barangay Pilar.
Padulong sur ang truck sang maglupok ang goma sini kag nadulaan sang kontrol ang driver nga si alyas “Jose”.
Nagsaylo sa pihak nga lane ang truck kag nabungguan ang kasugata nga compact SUV.
Sa tunga nga bahin sa pwertahan sang salakyan ang impact sang pagbungguanay. Sa diri nga parte nagapungko ang napatay nga Grade 10 student nga si alyas “Josef”.
Si Josef ang isa sa anum ka mga pasahero sang compact SUV nga ginamaneho sang iya amay nga si alyas Archie.
Samtang, patay man ang 19-anyos nga estudyante sang STI West Negros University sang makabunggo ang iya ginadala nga motorsiklo sa isa ka Carry sa national highway sang Sitio Dinandan, Barangay Anahaw.
Gikan norte kag nagapaliko pawala ang carry nga ginamaneho sang 56-anyos nga driver sang makabunggo ang motorsiklo nga padulong man sa pareho nga direksyon.
Bangud sang impact, nakaangkon sang madamo nga pilas si alyas “Genesis”.
Gindala siya sa Hinigaran Medical Clinic apang gindeklarar nga dead on arrival.*