May isa pa gid ka bangkay ang nasapwan kahapon sa nasunog nga ancestral house sa Purok 6, Brgy. Talubangi sa Kabankalan City sadtong tinalikdan nga Nobyembre 26.
Suno sa Kabankalan Bureau of Fire Protection, duha ang kumpirmado nga patay sa sunog.
Una nga ginkumpirma patay amo ang 84-anyos nga si alyas “Adelfa”.
Ang ikaduha nga casualty amo ang bata sang tigulang.
Wala nagdahum ang pamilya nga wala makaluwas ang bata nga lalaki ni “Adelfa” bangud abi anay nila nga nakalumpat kag nakagwa siya sa bintana.
Sa karon, ginahulat pa sang otoridad ang mga dokumento agud mahibaluan kun kay sin-o sa mag-iloy ang una kag ikaduha nga bangkay.
Subong man, wala pa ang resulta sang mga ebidensya nga ginpadala sa Fire Laboratory Service para sa chemical kag electrical analysis, agud matumod ang gintunaan sang kalayo nga naglamon sa bilog nga balay.*