Agud hanason ang abilidad sa pagtiro sang mga kapulisan sa Negros Island Region, nagpatigayon ang Police Regional Office-NIR sang pinakauna nga RD’s Cup 2025.
Ang duha ka adlaw nga shootfest, ang ginsugdan kahapon nga adlaw kag magatakup subong nga Biyernes, Hulyo 25.
Tinutuyo sang aktibidad ang pasanyugon ang katanda, gun safety practices kag tactical competence sang mga uniformed personnel gikan sa nagkalain-lain nga law enforcement agencies sa rehiyon.
Ang ini nga marksmanship kag firearms proficiency event ang ginpatigayon sa Kapanalig Firing Range, Camp Alfredo M. Montelibano Sr. sa Barangay Estefania, Bacolod City.
Nalakip sa five-stage Fun Shoot amo ang Team Match kag Open Match categories.
Ginsiling ni PRO-NIR Regional Director Police Brigadier General Arnold Thomas Ibay nga isa ini ka pamaagi agud hanason pa gid ang skills sang mga kapulisan.
Luyag man sang regional director nga ipasiguro kag ipakita sa publiko kag iban pa nga mga stakeholders sa bilog nga NIR, nga capable kag highly-trained ang mga kapulisan sa rehiyon.
