18 ka mga manug baligya bulak sa likod sang BAYS Center ginhatagan sang special permit

Tigayon na nga nahatagan sang siudad sang Bacolod sang special permit ang amo nga mga flower vendors agud makapabilin sila sa ila nga pwesto.

Personal nga ginhatag ni Mayor Greg Gasataya sa mga vendors ang ila nga mga permits kadungan sang ila mga identification cards ukon IDs.

Ginsiling ni Atty. Mark Mayo, City Administrator nga ang mga permits valid lamang sa sulod sang duha ka bulan kag kinahanglan ini i-renew sang mga vendors para magpadayon ang ila negosyo.

Ginahingyo sang mga vendors ang siudad nga kuntani mapangitaan na sila sang permanente nga pwesto.

Sa malawig na nga tion, subong lamang nakakuha sang legal nga dokumento ang mga vendors kag dako ini nga bulig sa ila bangud may mga dalagko sila nga kliyente nga nagapangita sang legal documents sa ila.

Dugang ni Mayo, sandig sa inisyal nga paghinun-anon sang siudad sa SM Bacolod, wala nadala ang ginapwestohan sang mga vendors sa ila plano nga pag-demolish sa BAYS Center.

Samtang magapatuman man sang experimental nga tikang ang siudad nga isaylo ang mga street vendors nga yara sa dalan sang Luzuriaga kag Gatuslao.

Siling ni Mayo, temporaryo sila anay nga ibutang sa Bonifacio street samtang ginpangitaan pa sang siudad sang permanente nga lugar nga ila pwedi maplastran.

[sibwp_form id=1]