Sa video nga kuha sang Task Force Disiplina, may isa sila ka lalaki nga gin sita kay naga ula sang basura sa may sapa sa Barangay Taculing. Sang ginpamangkot, ginsling sang lalaki nga nasuguan lang siya sang taga Acco Housing sa Alijis sa Bacolod. Dira niya kuno gin ula ang basura kay ang iban dira man naga ula sang basura.
May netizen man nga nagpadala sang sini nga video sa Digcast Negros sang actual man nga pag ula sang basura sa sini nga taytay sa may Narra Extension sa Bacolod. Sinako sako ang ila gina ula sa sapa.
Suno sa Task Force Disiplina may 12 na sila tanan ka mga persona nga nagkaladakpan sa akto nga iligal nga naga pilak sang basura sa mga bakante nga lote, sa highway kag sa mga suba.
Gin hatag ini sila sang first warning kag sa tiun nga madakpan liwat, multahan na sang kinyentos pesos.
Kun mag sige pa gid, sarang mapaskaan sang kaso nga pagsupak sa Republic Act 9003 ukon ang Ecological Solid Waste Management Act of 2000. Padayon ang pag libot sang task force para mag monitor sang mga iligal nga naga pilak sang basura.