Negros Occidental ang may mataas nga heat index base sa forecast sang PAGASA nga nag resulta sa pag suspend sang face to face nga klase sa dose ka mga banwa kag siudad.
Sa forecast sang DOST PAGASA subong nga adlaw, ang heat index sa probinsya yara sa 41 degrees celsius. Mas mataas pa gid bwas nga adlaw, Martes nga 42 degrees celsius.
Ang publiko suno kay Irene Bel Plotena, ang pamuno sang Provincial Disaster Risk Reduction Management Office ang dapat mag andam. Ipa-iway ang pag gwa ukon bulad sa initan las 10 sang aga tubtob las tres sang hapon. Dapat mag inom sang madamo nga tubig agudto malikawan ang malain nga epekto sang tuman nga kainiton.
May dose ka mga banwa kag siudad ilakip na ang Bacolod City ang nag paiway sang face to face classes agudto mapangapinan ang ikaayong lawas sang kabataan kag mga manunudlo. May yara naman sang LGU nga nag tugyan na lamang sa discretion sang school head ang pag suspend sang klase. Damlag pa ginsiling na sang DepEd nga may suspension man sang klase nagapadayon ang pagtuon sang kabataan bangud naga shift ayhan sa modular ukon online learning.
“Based sa aton nga information, may ara kita sang class suspensions today because of the heat index nga 41 degrees celsius and tomorrow is expected nga mas mataas pa gid ang aton nga heat index naton to 42. Stay indoors. Get hydrated. Ang aton protocols kun init indi ta mag pa expose gid particularly mag las 10 nga tam-an na gid ka init”, suno kay Plotena.
Sa pihak nga bahin, wala naman sang may nagdugang pa nga LGU nga nagreport water shortage magluwas sa Himamaylan. May 41 diyas naman nga wala makaulan sa Himamaylan sandig sa report suno kay Plotena.