Onse pa ka mga barangay sa Bacolod ang ginatinguhaan nga mapaidalom sa drug-cleared barangays sa siudad.
May 14 na ka mga barangay ang gindeklarar nga drug cleared sa Bacolod.
Gani ginatinguhaan karon sang katapo sang City Anti Drug Abuse Council nga madugangan pa ang mga barangay nga makabig hilway na sa impluwensya sang iligal nga droga.
Suno kay CADAC Program Coordinator Retired Police General Primitivo Tabujara, ila karon ginapabaskog ang community based drug rehabilitation program agud nga posible madugang ang onse pa ka mga drug-cleared barangays sa first quarter sang sini nga tuig.
Nalakip sa mga barangay nga natalana para sa assessment kag validation sang oversight committee ang Barangay 7, 19, 21,31, Barangay Alangilan, Alijis, Cabug, Felisa, Mandalagan, Pahanocoy kag Punta Taytay.
Ang pagpabaskog sang anti-illegal drug recovery kag rehabilitation program ang kabahin sa mga kabangdanan nga nagbaton sang award ang Bacolod gikan sa National Anti Drug Abuse Council sang nagligad nga tuig.