Silay CHO photo
11 ka dengue related deaths ang gin-report sang probinsya sang Negros Occidental humalin Enero tubtob Setyembre 15 sini nga tuig.
2,889 naman ang kadamuon sang dengue cases nga na report sa nagkalain-lain nga banwa kag siudad. Kun ipaanggid sa kasubong nga tion sang nagligad nga tuig 38.22 percent ini nga mas manubo.
Ginsiling ni Dr Ayessa Hugnatan, Provincial Health Officer 1, sa onse ka dengue deaths nga na-report, apat diri ang kumpirmado nga dengue.
Ang apat ka iban pa ang ginkamatay bangud sang lain nga rason, ugaling paathag niya kun na hambal sang duktor nga ‘to consider’ dengue, gina report man ang kaso nga dengue related death.
Ang tatlo ka iban pa sa 11 dengue deaths reported ang wala pa nila ma-review.
Wala pa man diri nalakip suno sa iya ang gin-report sang Silay nga 11 anyos nga bata nga napatay bangud man sang dengue sadtong September 15.
Suno kay Hugnatan, padayon ang ila nga kampanya sa matinlo nga palibot. Ang dengue sarang mag igo sa tanan na nga tion, tig-ulan man ukon tig-ilinit.
Ang La Carlota City ang may pinaka madamo nga dengue cases reported – 566, may isa ka dengue death.
Ang Bago City 236 dengue cases, may duha ka dengue deaths.
Ang Silay City ang ikatlo, 233 dengue cases, kag gin-report man sang ila nga City Health Office ang isa ka dengue death.
Abiso ni Hugnatan nga kun may gina batyag mas maayo nga mag pakig kita sa duktor, magpabilin man nga hydrated.
Labaw sa tanan padayon ang kampanya nila sa matinlo nga palibot para malikawan ang balatian nga dala sang lamok.
“Ang precaution ta ya amo gid na pirme, always gid na siya, ang 4S naton, seek early consultation, mga 4 o’clock habit naton, hydration. Kun kinanlan ta mag pa fogging or if ever may mga clustering of cases inform gid dayon si munisipyo or ang munisipyo gid mismo ma take action gid dayon, or whatever that we need to do like larviciding, health education”, suno kay Hugnatan.
[sibwp_form id=1]