Ginsiling ni Lt. Col. Norberto Barniso, hepe sang Cauayan PNP, nagpadulong ang iloy sang biktima sa police station sadtong Domingo sang udto bangud wala makapauli ang iya bata.
Nagpangayo man sang bulig ang mga himata sa pila ka mga media outlets agud makabulig sa pagpangita sa bata.
Sang Lunes sang hapon, ginkadtuan sang tiya ang lugar sa higad sang baybay kun diin masami nga nagahampang ang bata kag nagapalubong sa balas.
Natalupangdan sang tiya nga malum-ok ang balas sa lugar kun diin ulihi nga nakit-an ang bata.
Gani, nagpangayo siya sang bulig nga kutkuton ang balas kag didto na nadiskubrehan ang nalubong nga lawas sang biktima.
Suno kay Barniso, pirme nagakadto kag nagahampang sa area ang biktima.
Madamo man ang nakakita sa iya sa lugar apang wala sang may nakadepara nga nalubong na siya sa balas tungod man sang kalain sang tiyempo, suno pa sa pulis.
Sa inisyal nga findings, wala sang mga pilas sa lawas sang bata, nga isa ka Grade 4 pupil.
Sa karon, padayon ang imbestigasyon sa kaso kag ginahulat sang kapulisan ang result sang autopsy agud mahibaluan ang gintuna-an sang kamatayon sang bata.*
[sibwp_form id=1]