Sa sulod sang lima ka adlaw nga pagkutkot sang Bacolod City Engineer's Office sa Cabalagnan Creek sa Barangay Pahanocoy, nagdangat na sa 1,019 tonelada ukon 566 cubic meter ang lutak kag basura nga ila nakuha.
Ginsiling ni City Engineer Loben Ceballos, isa ka long-arm excavator kag isa ka amphibious backhoe nga ginbakal sang siudad ang gingamit sa amo nga operasyon.
Ginsugdan sang CEO ang pag kakas sang tanan nga higko sa amo nga creek matapos nga nag-awas ini sang gab-i sang Hulyo 13 samtang nagabubo ang ulan.
May mga balay sa kilid sang creek, rason nga tama ini nga delikado kun mag-awas.
Suno kay Ceballos, ang rason sang pag-awas sadto amo ang mga build-up nga mga sagbot kag lutak sa creek nga nagapugong sa pag-ilig sang tubig.
Sa karun, ginhawanan na ini sang CEO kag ginpangkakas naman ang mga hilamon nga nagtubo sa creek nga isa man sa ginatudlo nga rason nga nagapugong sa tubig.
[sibwp_form id=1]