Sa isa ka statement ginpakamalaot sang chairman sang Committee on Women, Gender, Family and Child care sa konseho sang Bacolod nga si Celia Flor ang rape joke sang isa ka radio anchor nga gusto niya i-rape ang reporter nga babaye para ma preso siya kag makaupod niya ang amay sa viral video nga nag sakit sa iya anak.
Makapila ka beses nga ginsulit sang anchor ang iya rape joke.
Suno sa konsehal gina kondena niya ang ano man nga sahi sang pahayag nga naga-normalize sang rape, pagpang-abuso sa kababayen-an, kag iban pa nga porma sang gender-based sexual harassment, bisan ano pa ang konteksto ukon intensyon sini.
Dugang pa niya, ang Bacolod City may yara na sang “Bawal Bastos Ordinance,” nga nagapatuman sang Safe Spaces Act ukon Republic Act No. 11313 sa lokal nga lebel.
Ini nga ordinansa nagapakita nga ang makahalit nga mga tinaga, pagpamahog, kag mga pahayag nga nagapakalain sang dignidad sang tawo nagadugang sa kultura sang pagpabaya kag tolerance sa pagpang-abuso.
Ginapanawagan niya ang tanan, labi na ang katapo sang media, nga mangin responsable sa ila mga pahayag kag magbulig sa isa ka komunidad nga nagapangapin kag nagatahod sa kababayen-an kag kabataan.*
[sibwp_form id=1]