Isa ka mangingisda nga taga Carles City, Iloilo ang nakit-an kag na-rescue sang katapo sang Coast Guard Sub-Station Lakawon samtang naga-utaw-utaw sa baybayon sa tunga sang Lakawon Island kag Barangay Cadiz Viejo sa Cadiz City sadtong Lunes.
Suno sa Coast Guard, bangud sa dalagku nga balod kag kalain sang tiyempo tuga sang Amihan, nagkulob ang motor banca ni alyas “Junrey” samtang nagalayag siya sa baybayon sa tunga sang Bantayan Island kag Carles sadtong Enero 3.
Nakita sang mga katapo sang Coast Guard ang mangingisda samtang sila ang naga-transport sang mga stranded nga guests halin sa Lakawon Island Resort padulong sa Cadiz Viejo Port, sakay sang Lakawon Island Resort and Spa recreational boat JADD 1.
Gindapatan sang first aid ang mangingisda kag gindala sa Cadiz District Hospital agud mapaidalum sa medical evaluation, laboratory examinations kag ma-monitor ang iya vital signs.
Dako ang pagpasalamat sang pamilya sang mangingisda nga na-rescue kag buhi ang ila himata.*
[sibwp_form id=1]