Color pa lang gate may hint ka na nga Laker fan ang tag-iya Mamba Grill diri sa 2nd Road, Venus Street sa Puentebella Subdivision sa Barangay Taculing.
Sa sulod sang malapad nga compound nga ginhimu nga kapehan kag kalan-an makita ang malapad nga mural painting sang nagtaliwan nga basketbolista nga si Kobe Bryant nga mas kilala man sa monicker nga the mamba.
Pati pulungkuan sa coffee shop purple man ang color.
Suno sa magkahagugma nga si Dr. Ralph Jardeleza kag anna mel grace normandy nga isa ka nurse, pareho sila nga fan ni Kobe amo nga bilang pagkilala sa nagtaliwan nga anay NBA superstar, napamensaran nila nga itukod ang grill.
Bilang basketball enthusiast luyag man ni Jardeleza nga bisan paano matagaan sang higayon ang mga kasubong niya nga mahilig sa basketball nga bisan paano makapabalhas amo nga natukod sila sang basketball court.
Sang Setyembre 25 isa ka soft opening ang ila ginpatigayon kag wala sila magdumdom nga madamo sa ila mga customer ang magbalik balik para matilawan ang ila produkto.
Bisan wala pa ang ila grand opening, gaka sold-out na ang ila mamba milktea kag coffee.
Upod sa handum nga makabangon ang pungsod sa epekto sang pandemic, ginasigurado man sang tagdumalahan sang grill ang pagpatuman sang minimum health standard protocol.
Fully vaccinated naman ang tanan nila nga mga empleyado.
Ang mamba mentality ang naghatag giya indi lang para kay Kobe Bryant para mangin madinalag-on sa iya nangin passion nga amo ang basketball. Nangin inspirasyon man ini para sa mga bag-o nga henerasyon sang mga ballers kag bisan sa mga kasubong nanday Jardeleza kag Normandy sa handum nga mangin madinalag-on sa ila negosyo kag sa matag-adlaw nga pagpangabuhi.