Naandan na ang pagdaw-anay sang plete sa mga pampubliko nga salakyan kasubong sang jeep kag bus.
Pero pinaagi sa automated fare collection system nga igalunsar sang Vallacar Transit Incorporated, sarang na ini mapaiway kag posible man ini makabulig sa pagpahagan-hagan sang paglapta sang kaso sang Covid 19 ilabi na sa probinsya.
Suno kay Jade Seballos, pamuno sang media relations sang VTI, ang cashless transaction ang nahauna nga igapatuman sang bus company upod man sa Department of Transportation diri sa Visayas.
Ginasuguran na sang bus company ang pagpanagtag sang libre nga AFCS cards.
Ang AFCS nga malawig na nga ginapatuman sa mga railway system ang kabahin sang modernization program sang DOTr kag sang pinakadako nga bus company sa pungsod. Imbis mag bayad sang cash ini na ang gamiton pinaagi sa pag swipe sang card.
Sa Lunes na ilunsar sang VTI ang sistema kag ang Bacolod–Victorias lang anay nga rota ang mangin pilot area.